Attualità

​

Arimani màrcuri 21 frivaghju 2024, a radio suciativa Frequenza Nostra 99 FM, I Salini in Aiacciu, hà ricivutu in fin di dopumeziornu l’associu aiaccinu Filu d'Amparera di u poghju Santa Lucìa.

U studiu di a radio hè statu propiu u locu di una festa magnìfica di ghenti d’ogni leva di ziteddi è di parsoni maiò. I ziteddi di u studiu di cantu di Filu D'Amparera ani cantatu sottu à a dirizzioni di Istria Vanina i canti cumposti insemu da Rinatu Coti è Jean-Pierre Godinat . Un veru incantu, un soffiu di criazioni hè statu trasmissu da ‘ssi boci ghjuvanili.

Dopu si sò intesi i boci I maistrelli , anch’eddi di Filu d’Amparera, cù canti criati in senu di l’associu da u listessu pueta è u listessu cumpusitori.

Eppò sò apparsi pà a prima volta un gruppu di dui musicanti Alchimia unu chì scrivi è cantu è l’altru chì cumponi a mùsica. A boci di u cantanti hè una maraviglia. Si risenti attraversu ad eddu calcosa d’ùnicu, rarìssimu ancu, chì pari isciutu fa i tempi più landani. Un terzu cumpagnu rittrata è filma.

Ci hè statu dinò François Jandolo, prufissori di piano è ghitara à Filu d’Amparera, chì hà sunatu di ghitara è cantatu. Hè unu chì cunnosci propiu bè fà altru u clàssicu, u jazz, quant’è u rockabilly.

À certi mumenti ani tutti cantatu è sunatu insemu. Stondi d’aligrìa è di spartera. C’era l’animatori Félix Bonardi, a squatra di a radio è quidda di Filu d'Amparera. Rinatu Coti hè cunchjusu ramintendu i valori di a cultura corsa, purtata da a lingua, chjamendu à a spartera in ogni duminiu di modu à crescia l’umanu drentu à ogni parsona nel mondu d’oghji.

Unu spuntinu hè statu u benvinutu…